Pages

Tuesday, September 20, 2011

البرنامج الاذاعي القايلة يرفع شعار انا كويتي!

 تدرون شي حلو لما القى برامجنا وتلفزيوناتنا وهدومنا كل شي فيها شي كويتي تدرون ليش ؟؟ لان الحابل اختلط بالنابل .. وعيالنا قاموا يحفظون كلمات المتأكوتين ... انا ما اقلل من قيمة اي شخص تربى على هالارض ويتكلم بلهجتها لا بالعكس يا هلا ومرحبا فيكم بس ياخي يا تتكلمون كويتي عدل يا انطموااا .. تعرفون شنو يعني انطمواا؟؟
عموما لا اشتط واروح بعيد المذيع المتألق مايك مبلتع دزلي دعوة لحضور المؤتمر الصحفي في مطعم لونتر لانطلاقة برنامجه الاذاعي على كويت اف ام ولكن ما حالفني الحظ وتوهقت في اجتماع وما طلعت مبجر فا كلش ما مداني واشكره من كل قلبي على الدعوه .. و طبعا اختي PinkGirlQ8  مراسلتنا من الحدث ما قصرت قواها الله صورتلي جم صوره ودزتهم لي ... وطبعا بعد قراءة تغطيات الكل خذيت فكرة عن البرنامج.
برنامج القايلة سيبدأ البث في الثاني من اكتوبر وسيبث يوميا من الساعة 1-3 ظهرا سيتطرق البرنامج لعدة مجالات وطبعا يدير البرنامج كل من المتميز مايك مبلتع و طلال الياقوت .. متخيلين؟؟ اعتقد هالحزه محد راح يشتغل ومع اني مو من عشاق البرامج الاذاعية الا ان هالاثنين ما يتطوفون لااااااااا وفوق هذا في واحد اسمه حمزة يقلد كل الشخصيات والاصوات يعني حده stay tunned.
البرنامج راح يتطرق لعدة مجالات ومواضيع منها تقاليد الكويت و ماضيها , نشاطات رياضية, مواضيع اجتماعية يعني بالضبط جنها  زوارت الضحي حطوا الشاي والقهوة وسمعوهم .. وفوق هذا يعتبر البرنامج كويتي 100% يعني تخيلوا منو يغني مقدمة البرنامج ؟؟ 
اي اي اي اي Army of one  الفرقة الكويتية الي تغني راب .. تدرون شنو الي احبه !! ان يكون في مكس بين الماضي والحاضر ويتم الطابع الكويتي موجود .. برافواا مايك مبلتع وطلال الياقوت ان شاء الله انتو الي بتعيدون امجاد الراديو الكويتي .. يلا يا جماعة ردوا خزنوا رقم محطة اف ام الكويتية 103.7 .. واخيرا القطاعات الحكومية بتتطور بسواعد عيالها ... ونسيت اقولكم ان بيستضفون بعض المدونين!! لا تنطروني مستحيل اطلع بالراديو والله اتلعثم ماعرف اقول كلمتين على بعضهم ... قواكم الله وعسى الله يوفقكم
هذا شعار البرنامج والصورة اشكره مبيوقه من PinkGirlQ8 لا عاد الصج مو مبيوقه اخاف تقولون وين اللوقو مالها .. والله اهي دازتها بمحض ارادتها بنكوووو تسلفيني ال تي شيرت؟؟

3 comments:

Umzug Wien said...

شكراً على الموضوع ... :)

entrümpelung wien said...

شكرا لكم .. دائما موفقين ..::))


entrümpelung
entrümpelung
entrümpelung wien

شراء شعار said...

thank you

Post a Comment