Pages

Wednesday, September 7, 2011

مباراة الكويت شفتها وياليتني ماشفتها

 الناس تعرفني عارفه انا كلش مو من محبين رياضة كرة القدم نهائياااااااا ... بس هذا ما يمنع اني اشجع منتخب ديرتي لما يوصل للمراحل النهائية من حصوله على شئ يرفع اسم ديرتي .. المهم وصلتني دعوة من فيفا للاتصالات لحضور مباراة كرم القدم في استاد الصداقة والسلام ... المهم عقب ماسويت بعض الترتيبات وضمنت اني مو رايحة بروحي رحت الصبح حق فيفا علشان استلم التذاكر
 .. وبعدين رحت اشتري التيشرتات حقي وحق بنت اختي علشان ندخل اجواء المباراة ويكون لبسنا ملائم لللاجواء مع العلم انا بحياتي مارحت ملعب ولا اردي شالطبخه
طبعا احنا كنا معزومين عند مكان كبار الزوار (طل) ورحنا بنسفط بمواقف كبار الزوار وقال لنا الشرطي ان ماكو مواقف فا لازم نسفط بعيد !! ماكو مواقف هااا؟؟
كلش ماكو مواقف؟؟ تدرون والله العظيم لو شنو مستحيل اروح مباراة بالكويت ما اكون ضامنه مليون بالمية ان دخولي يكون فيها لمكان محترم ... الاجواء العامة مالت المباراة وروح المشجعين عجيبه .. بس الي ابي افهمه شلون ناس شاريه تذاكر ومافي لها مكان ؟؟ شلون يعني بايعين تذاكر على الله ؟؟ يعني في ناس زرقت ناس وصارت السالفه فيها واسطات ؟؟ حسبي الله عليهم حتى بالملعب!! هذا غير المشاهدة الي شفتها وقفت قلبي شرطي ماسك واحد من تي شيرته وبلاوي ؟؟؟وياليت السالفه وقفت الين هني حتى احنا لقينا الاماكن مالتنا مأخوذه ؟؟ ومسكرين الباب ولا بلوقر قدر يدخل بالمكان الي المفروض يدخل منه !!
 متخيلين وانا بصراحة سألت فيفا اذا شغلكم مرتب انا ماراح اروح واخذ اليهال , بس اكدوا لي ان الشغل مرتب !! الكل قاعد يعتب على الاتحاد ويقولون مو غريبه عليه !! يمكن صح بس لما فيفا شافوا الوضع كلش مو مرتب المفروض يخلون احد ينطرنا برا مو الله يهداهم قاعدين مندمجين بالمباراة وناسين معازيمهم ؟؟ او على الاقل يدزون لنا مسجات او حتى ايميل مثل ما دزوا ايميل الدعوة؟؟ انا بصراحة مالي شغل بالاتحاد وان هذا طبعه لاني ما انعزمت من الاتحاد انا انعزمت من فيفا!! 
 بعدين طلع لنا هذا الشاب اللطيف علي بن محمد "كان ودي اعصب عليه بس صج دمه خفيف" يعني لو متكلمه وياه بوضع غير الي كنا فيه كنت راح امدحه الحين .. المهم قالنا شيلوا قشكم وروحوا اذا انتوا مو شيوخ ماتدخلون هني ؟؟ قالوا له بقانون منو ؟؟ قال بناء على اللستة الي عندي !! قلت له لو ايبلك شيخ الحين تدخلنا قال هااا لحظة لا اقصد شيوخ اللسته !! صج والله ذكرني بمسرحية عبدالحسين عبدالرضا لما كانت يتكلم عن شيوخ الدامه ؟؟؟ المهم اخر شي قلنا يب اللستة وطلع لنا اماكن بس اهوا مضيع .. ودخلنا بعد بأخر الشوط الاول ... وشفت المباراة من الملعب وياليتني ماشفتها هناك على هالتغربل
 
 بس اشوه دخلنا ولحقنا على قول التعادل .. ومبروك التعادل وعقبال الفوز في كوريا .. تبون تشوفون خوش صور دخلوا هاللنك ,, بالنهاية اشكر الاخت مي السبيعي على اتصالها والاعتذار وتوضيح الموضوع .. وكلام الحق ينقال صج انا احنا متعودين ان شغل فيفا دايما مرتب ومتعوب عليه بس ارجع واقول همن كان المفروض يتصلون فينا او يدزون ايميل .. المهم اخر شي رجعنا البيت وقمنا نصور مع نعمان وملسون ياحلوهم والله..

5 comments:

Q-80 said...

انا رحت ويوم شفت اللويه! دقيت سيارتي سلف ورديت البيت كلش مو مستاهله السالفه! الله يعينكم :)

Nouri said...

انه الواحد يروح يشجع منتخب ديرته هذا ما عليه كلام، بس انك اتمرمط على ابو انه انا معزوم لا و بالمقصوره بعدين يطلع الموضوع الله بالخير، هذا عيب و عيب كبير من شركة راعيه رئيسية حق المنتخب

اذا مو قدها لا تدقون الصدر

و اخيرا يا حلات نعمان و ملسون مع تيشيرت المنتخب

Rainy said...

Q-80: والله كنت اول مره اروح وتحمست الظاهر زيادة علي اللزوك مادري الظاهر حسبالي بامريكا مو الكويت وبعدين مابي اكسر بخاطر اليهال

DragsterQ8: والله انا عتبي على فيفا ليش ما خلوا احد يقعد برا لو اول ساعه بس .. وانقهرت زيادة لما دخلت ولقيت فريق التواصل الاجتماعي قاعد متكي داخل .. اي والله نعمان وتي شيرت فريقنا صج كويتي

Mubarak Esmail said...

فعلاً ماكو تنظيم ، أنا صارلي ساعتين تقريبا واقف بره
!

The Bodyguard said...

I agree with you , you can never find a parking space in any of the big games here.
But i did watch it at my BIG screen with popcorn sitting on the sofa .. Mabrouk for the Kuwaiti team and wish they take us to the finals like they did in the 80's

اوه ياالزرق العب بالساحة
يا كويت

Post a Comment